Gjatë fjalës së mbajtur sot në Lezhë me rastin e 105 vjetorit të themelimit të Policisë së Shtetit, kryeministri Edi Rama vlerësoi punën e policisë sidomos në çrrënjosjen e kanabisit. Sipas tij viti që shkoi i dha fund kanabist në vend dhe shënon një fitore të policisë ndaj krimit.
Por Kryeministrit i ka mbetur si model suksesi vetëm Lazarati, prandaj e përmendi sërish edhe në fjalimin e sotëm. Ndërkohë që sic dihet e gjithë Shqipëria u shndërrua në një Lazarat të madh, ku kultivoheshin tonelata me kanabis.
“Sot Shqipëria s’ka më as Lazarat dhe as lazaratër të shpërndarë në trupin e saj”, u shpreh Rama duke shtuar se beteja e policisë me krimin vazhdon.
Sipas tij Policia e Shtetit është sot institucioni më i besuar në vend. Për këtë ai iu referua raporteve ndërkombëtare. Por të mos harrojmë se në dhjetra raporte të SHISH, qindra policë dhe drejtues të lartë të saj ishin evidentuar si organizatorë të biznesit kriminal të kultivimit të kanabisit.
©LAPSI.al
