Mbarësinë që i solli viti 2017, përfaqësuesit e popullit dhe të qeverisë e festuan siç i ka hije pushtetit. Të gjithë deputetët dhe stafin e afërt në kryeministri, Rama i bëri bashkë për një festë ditët e fundit të dhjetorit.
Socialistët u mblodhën në një rezort në periferi të Tiranës, mes ambjenteve të kuruara me kujdes, ku mbizotëronte ngjyra e Rilindjes.
Tavolinat kanë qenë të mbushura plot e përplot me ushqime dhe alkool sipas dëshirës. Për të argëtuar udhëheqjen ishin porositur edhe grupe të kërcimit, që mes këngëve dhe valleve kanë ndezur darkën.
Mungesa e Saimir Tahirit vlen vetëm për statistikë në këtë rast, sepse prej kohësh, ish ministri nuk është pjesë as e tavolinave të këtij lloji.
Vetë Rama mbërriti pak me vonesë në festë, për të shmangur sikletin e përgatitjeve të para, kur të gjithë uleshin nëpër vendet e caktuara, sipas miqësive dhe grupeve të përbashkët.
Privilegjin për t’u ulur në një tavolinë me liderin e kanë pasur vetëm disa të përzgjedhur. Në këtë foto duket që Rama përshëndet sekretarin e tij në kryeministri, Engjëll Agaçin, ministri Damian Gjiknuri dhe deputetin Ulsi Manja.
Atmosfera ishte disi më e ftohtë në fillim të ziafetit, kur të gjithë i kishin sytë nga tavolina e “të madhit”, në pritje të ndonjë urimi apo përshëndetjeje speciale, por me kalimin e orëve të ftuarit u çtendosën dhe e shijuan darkën, të ngrohur edhe nga avujt e alkolit, siç ndodh rëndom në këto raste.
Në fund, urimet janë bërë para tortës, për të cilën më entuziaste kanë qenë gratë deputete.©Lapsi.al
