Kryeministri Edi Rama ëshë shfaqur sot i veshur si Babagjysh tek e Diela Shqiptare. Rama i erdhi në ndihmë dy fëmijëve, duke garantuar transportin në shkollë për më të voglin, që ishte i paralizuar dhe një premtim për punë në ministri për vajzën. Rama tha se njerëzit e thjeshtë duhet të zënë më shumë vend në ekrane, që janë pushtuar nga sherret e politikës dhe nga krimi.
Leo, 9-vjeçar ka lindur me një defekt në kocka, dhe për vite me radhë i është nënshtruar operacioneve të ndryshme. Edhe pse mjekët janë shpresëplotë se Leo do të ecë, kjo ditë po vonon.
Ditën e sotme në rubrikën “Ka një mesazh për Ty” tek Ardit Gjebrea, nëna e Leos ka treguar historinë e saj dhe të djalit të vogël, ku ka bërë apel për ndihmë. Ajo çka ka prekur të gjithë, ishte letra që Leo i ka shkruar këtë fundvit Babagjyshit të Vitit të Ri. Mes rreshtave, shihet dëshira e djalit për t’u shëruar, për të studiuar dhe për t’u bërë dikush në të ardhmen.
Dhe kjo letër ka prekur edhe kryeministrin Edi Rama, i cili nuk ka mundur t’i mbajë lotët teksa ka ndjekur live gjithë rrëfimin.
Leo, teksa ka hyrë në studio në karrocë me rrota, është shprehur se nga Babagjyshi pret këtë vit një makinë me të cilën të mund të shkojë në shkollë, dhe një fizioterapist që ta ndihmojë.
Fill pas këtij momenti, në studio ka hyrë kryeministri Rama i veshur si Babagjyshi i Vitit të Ri dhe i ka bërë surprizën e veçantë, duke ia realizuar dëshirat.
