Prokuroria ka kërkuar heqjen e mandatit për deputetin e PDIU-së në Elbasan, Aqif Rakipi dhe deputetit të LSI-së Gledion Rahovica. Kërkesa është firmosur nga Shefja e Sektorit të Dekriminalizimit, Rovena Gashi, dhe u dorëzua sot në Komisionin Qëndror të Zgjedhjeve. Dyshohet se deputetët kanë gënjyer për të kaluarën e tyre në formularin e dekriminalizimit, në lidhje me problemet që kanë pasur në të shkuarën me drejtësinë. Për deputetin e LSI-së në Berat, organi i akuzës pretendon se ai është arrestuar për vjedhje, por ka përdorur emra të tjerë të padeklaruar.
Lapsi.al sjell më poshtë formularin e vetëdeklarimit nga deputeti i Elbasanit dhe deputetit të Beratit.
Aqif Rakipi
Siç shihet, Aqi Rakipi ka deklaruar se gjeneralitetet e mëparshme të prindërve të tij kanë qenë Karaman (babai) dhe Violeta (nëna). Ndërsa gjeneralitetet e tyre aktuale janë Kahraman (babai) dhe Nurije (nëna). Nuk dihen arsyet përse prindërit e tij figurojnë me dy emra dhe as pse Prokuroria pretendon se Rakipi ka fshehur të kaluarën e tij. Burime të Lapsi.al nga organi i akuzës thonë se Aqif Rakipi ka pasur probleme me drejtësinë në Itali. Hetimet ndaj tij kanë nisur rreth 6 muaj më parë . Deputeti i PDIU-së deklaron se ka jetuar në Milano në periudhën 1993-1999 për arsye emigrimi.
Mbetet për t’u parë se çfarë vendimi do të marrë Komisioni Qëndror i Zgjedhjeve ndaj kësaj kërkese të Prokurorisë. Kujtojmë që KQZ më herët ka rrëzuar kërkesën e Prokurorisë për t’i hequr mandatin kryebashkiakut të Tepelenës, Tërmet Peçi dhe kryebashkiakut të Mallakastrës, Agron Kapllanaj.
Gledion Rahovica
Deputeti i Beratit për të cilin kërkohet heqja e mandatit nga Sektori i Dekriminalizimit në prokurori, ka dorëzuar formular të pastër në KQZ. Në të kaluarën e tij Gledion Rahovica pranon se ka jetuar për 5 vjet në Itali, kohë kur ka kryer studimet në Romë. Nuk dihet çfarë ka zbuluar shefja e Sektorit të Dekriminalizmit në prokurori, Rovena Gashi, pasi dokumenti në KQZ mbahet ende i fshehtë. Më poshtë mund të lexoni formularin e dekriminalizimit të dorëzuar nga deputeti i LSI-së Gledion Rehovica.
©LAPSI.al
