Dritan Zagani, ish-zyrtari i lartë i policisë së Vlorës, që denoncoi i pari lidhjet mes ish-ministrit të Brendshëm, Sajmir Tahiri dhe Habilajve në trafikun e drogës, ka reaguar përmes një komenti në rrjetet sociale, në lidhje me ndryshimet e pritshme në prokurori. Zagani i referohet informacioneve në media, sipas të cilave në krye të Prokurorisë së Krimeve të Rënda do të emërohet Anton Martini. Nga arratia Zagani kujton se ishte ky prokuror që kërkoi arrestimin e tij.
“Pretendenti për “fronin” e drejtuesit të Prokurorisë për Krimet e Rënda një farë tipi që mbahet si prokuror i famshëm nga të gjitha linjat e politikës sonë të “pastër”. Kjo sepse ai me servilizmin e tij të pafytyrë ndaj të fortëve apo politikanëve se ka problem të shkeli ligjet apo edhe të shkatërrojë jetë njerëzish me pa të drejtë” – shkruan Zagani.
“Ky zotëri është njeriu që për të marrë “meritat” nga politika e radhës në fuqi, gjitha shpifjet që u instrumentalizuan në një mënyrë banale nga sejmenët e “Sajes” në Ministrinë e Brendshme, i “ligjëroi” duke ngritur një akuze farsë ndaj meje, që edhe pse na paskësh pas shumë prova, ka pothuaj 4 vjet që akoma nuk është mbyll si proces gjyqësor. Dhe sot ky farë prokurori do bëjë “drejtësi”. Siç duket vetingu paska filluar me këmbë të mbarë” – shkruan Zagani. ©LAPSI.al
