Gjykata e Apelit Durrës ka refuzuar të pezullojë nga detyra tre gjyqtarë të akuzuar për korrupsion, duke rrëzuar kërkesën e Prokurorisë së Krimeve të Rënda. Gjykata e Apelit nuk e ka pranuar kërkesën e Krimeve të Rënda për të pezulluar gjyqtarët Kliton Spahiu, Petraq Dhimitri dhe Petrit Çeno.
Këta gjyqtarë akuzohen për korrupsion, pasi kanë shkuar në Spanjë dhe kanë parë ndeshjen Barcelona-Real Madrid. Prokuroria e Krimeve të Rënda ka ngritur dyshime të forta se udhëtimi i tre gjyqtarëve drejt Spanjës është paguar dhe financuar nga një person që gjyqtarët e kishin në proces gjykimi. Prokuroria pretendon se nëpërmjet kartës së kreditit të personit nën hetim është paguar hoteli i ku kanë fjetur tre gjyqtarët në Spanjë.
Është vërtetuar nëpërmjet letër-porosisë se hoteli është paguar nga karta e kreditit të një personi që gjyqtarët e kishin në proces gjykimi. Bëhet fjalë për një proces civil dhe tre gjyqtarët kanë marrë vendim pro personit që ka paguar hotelin me kartë krediti.
Krimet e Rënda iu drejtuan pak ditë më parë Gjykatës së Shkallës së Parë për Krimet e Rënda, duke kërkuar pezullimin e zyrtarëve, por ka qenë gjyqtari Luan Haziri që ka refuzuar kërkesën e Prokurorisë, duke mos pranuar pezullimin e tre gjyqtarëve.
