Shqiptarëve iu duhet të ndjekin televizionet greke për të kuptuar diçka nga negociatat për kufirin detar me Greqinë. Më saktë, nuk duhej humbur emisioni “Next Day” i televizionit publik grek “ERT”, për këdo që kërkon të informohet, pasi në anën tonë të kufirit negociatat janë mbuluar nga një terr informativ. Në emision u transmetua një intervistë e Nikos Kotzias, që zbuloi tangent pretendimet e palës greke për kufirin. Ministri i Jashtëm grek po fliste për kufirin me Turqinë, ndërkohë që përmendi edhe atë me Shqipërinë.
“Nuk është në axhendën e diskutimeve me Turqinë, por problemi ynë qëndron tek shelli (rafti) kontinental. Teknikisht për të përcaktuar raftin kontinental, duhet përcaktuar zona e Egjeut, çfarë do e kryejmë pjesë-pjesë. Teoria se të gjitha bëhen automatikisht nuk solli asnjë rezultat prej vitesh. Në emër të maksimalizmit nuk bëhet asgjë. Delimitimi detar është mjaft i rëndësishëm për Greqinë, për përcaktimin e AOZ veçanërisht me Shqipërinë, të drejtat tona sovrane janë mese prioritare nga të gjitha aspektet”, deklaroi Kotzias.
Pak ditë më parë, qeveria shqiptare mori një vendim surprizë për varrezat greke. Në mungesë totale të transparencës, me diskutime të fshehta ishte rënë dakort kërkimi dhe ndërtimi i varrezave të ushtarëve grekë në disa qarqe të vendit. Në këmbim, pala shqiptare duket se ka marrë premtimin për heqjen e ligjit të luftës dhe kjo kuptohet nga tema që ka hapur Kotzias në emisionin grek "Next Day".
“Problemi kryesor që duhet të zgjidhet pozitivisht është Ligji i Luftës. Pasojat ligjore do të rregullohen me një procedurë të veçantë. Sipas qasjes sime të parë, dekreti – sipas të cilit Greqia i shpalli luftë shqiptarëve, – ishte dekret mbretëror. Ekzistojnë dy interpretime ligjore. I pari, me të cilin jam pranë edhe unë sipas një këndvështrimi ligjor (që të hiqet ligji i luftës), dekreti mbretëror është i barazvlefshëm me një dekret presidencial. Por ka edhe një interpretim të dytë, që sipas meje nuk është edhe kaq rigoroz. Por kërkon debat kur të vije koha e tij. Ky interpretim thotë se, dekreti mbretëror ishte në një kohë kur nuk ekzistonte Parlamenti, e për këtë arsye nuk mund të kishte një dekret parlamentar, kështu që tani që ka një Parlament le ta formulojë atë. Por nuk korrespondon Parlamenti me dekretin mbretëror, korrespondon me dekretin presidencial”, tha Nikos Kotzias.
Në mungesë totale të informacionit për këtë çështje, çdo koment do të ishte i tepërt. Deri në datën 20 Janar, kur të jetë takimi i radhës me Greqinë, duhen monitoruar televizionet e vendit fqinj.© Lapsi.al
