Kreu i Partisë demokratike, Lulzim Basha foli me rezerva për propozimin që i bëri një ditë më parë ish kryeministri Sali Berisha sipas të cilit opozita duhet të shkojë drejt “asgjësimit të mandateve”. Në një konferencë për mediat, kreu i PD-së tha se “opsionet janë të hapura”, por shtoi se “vendimi do të merret në interesin më të mirë të shqiptarëve”. Propozimi i Berishës nuk u prit me entuziazëm as nga LSI. Monika Kryemadhi tha se “mandatet e deputetëve janë mandate gjaku” dhe se ajo nuk ishte dakort që të digjeshin. Opozita po përgatitet për protesta kundër kapjes së prokurorisë nga Edi Rama dhe ka paralajmëruar daljen në rrugë në fillim të janarit.
