Në një vend normal, diplomatët do të ishin shpallur non grata. Kështu shkruan ish-ministri i Drejtësisë, Ylli Manjani për ambasadorin e SHBA, Donald Lu dhe atë të BE-së, Romana Vlahutin, lidhur me qëndrimin e tyre për zgjedhjen e kryeprokurorit të ri.
Nëpërmjet një postimi në Twitter, Manjani shprehet se Lu dhe Vlahutin nuk mund të vendosin për çështje që i takojnë strikt përfaqësuesve të popullit shqiptar, dhe që më pak të vendosin duke sugjeruar shkeljen e Kushtetutës.
Lu dhe Vlahutin mbështetën vlerësimin e Euraliusit dhe Opdatit, sipas të cilëve për të zgjedhur kryeprokurorin e përkohshëm mjafton edhe një shumicë prej 36 votash.
Opozita është shprehur kategorikisht kundër emërimit të një kryeprokurori me kaq pak vota, pasi sipas tyre, do të përdoret nga mazhoranca për të mbyllur dosjet e nxehta të muajve të fundit, si të Habilajve, Tahirit dhe Vangjush Dakos.
POSTIMI:
Lu&Lei nuk mund të vendosin për çështje që i takojnë strikt përfaqësuesve të popullit Shqiptar! Aq më pak mund të vendosin duke sugjeruar shkeljen e Kushtetutës së Republikës! Në çdo shtet normal, do tu ishte filluar proçedura e shpalljes non-grata, në një situatë të tillë!
