Ministria jonë e Jashtme ka përshëndetur marrëveshjen e aktorëve politikë e shoqëror shqiptarë në Tuz të Malit të Zi për të konkuruar të bashkuar në zgjedhjet lokale. Këtë qëndrim ministria e ka bërë publik përmes një deklarate të lëshuar për mediat.
Ministria vlerëson përpjekjet e partive shqiptare në mbrojtje dhe përfaqësim të interesave të shqiptarëve në Trevën e Malësisë gjatë procesit të zgjedhjeve për në këshillin komunal të komunës së Tuzit, që mbahen me 26 nëntor 2017.
“Ministria për Evropën dhe Punët e Jashtme e Republikës së Shqipërisë mirëpret ndërgjegjësimin e faktorëve politike e shoqërorë shqiptarë në Malin e Zi për të nxjerrë mësime nga problemet, dasitë dhe dështimet e së kaluarës. Ajo konsideron se angazhimi publik për të bashkuar zërin dhe forcat për të shfrytëzuar maksimalisht hapësirën e rregullave të lojës demokratike për të maksimizuar rezultatin përbën rrugën e duhur dhe mënyrën më të mirë për të realizuar të drejtat që u garanton ligji dhe kuadri ligjor në Malin e Zi dhe ai ndërkombëtar, në përputhje me pritshmeritë dhe kërkesat e popullsisë shqiptare për mirëqeverisje, progres dhe begati.” – shkruhet në deklaratë.
