Deputeten e LSI-së me Edi Ramën e lidh një njohje e vjetër, që nga fëmijëria. Nora Malaj e ka treguar këtë detaj gjatë një bisede në Oraneës, ku ka shtuar se kishte marrë një propozim nga kryeministri Edi Rama për të braktisur LSI-në dhe për t’iu bashkuar grupit parlamentar të Partisë Socialiste.
“Rama më ka propozuar të shkoj tek partia e tij, por nuk kam pranuar”, ka thënë ajo duke konfirmuar se i ka rezistuar kësaj oferte.
Gjithashtu Malaj ka zbuluar, se Edi Rama është shoku i saj i fëmijërisë dhe se kanë punuar shumë bashkë, por ka qenë edhe një kundërshtare e flaktë e disa prej vendimeve të tij.
“Me Ramën kam edhe një lidhje. Unë dhe Edi jemi shokë fëmijërie dhe shokët e fëmijërisë nuk zgjidhen, por i ke. Në këtë raport kam pasur një ndjesi mbështetëse por e kam respektuar në pozicionin e Kryeministrit, kemi punuar shumë bashkë, më ka dëgjuar edhe kur kam qenë e prerë, kemi pasur edhe përplasje dhe në disa çështje, kam qenë kundërshtare e flaktë e tij”, rrëfeu ajo lidhjen speciale me kryeministrin.
Nora Malaj qëndroi për 8 vjet si zv.ministre. Ajo ishte zv.ministre e Arsimit edhe kur kaloi reforma për arsimin e lartë, një prej projekteve më të sulmuara nga Monika Kryemadhi.
Kur Monika Kryemadhi u pyet për Nora Malajn si përfaqësuese e LSI-së për reformën në arsim, ajo e zhvlerësoi duke e konsideruar një nëpunëse të thjeshtë.
