Policia e Durrësit ka ndërmarrë dy operacioni anti-drogë në 24 orët e fundit, që kanë përfunduar me arrestimin e 3 personave dhe procedimin në gjendje të lirë të një 31-vjeçareje.
Drejtori i Drejtorisë Vendore të Policisë Durrës Drejtues Alfred Çepe, tha para mediave se në vijim të punës për parandalimin dhe goditjen e rasteve te prodhimit dhe shitjes së lëndëve narkotike, nga Strukturat e Drejtorisë Vendore të Policisë Durrës janë finalizuar dy operacione antidrogë të koduara “Vazhdimësia” dhe “Mafsheq”.
Në këto operacione janë sekuestruar Heroinë, Cannabis Sativa, peshore elektronike, vlera monetare dhe aparate celularë.
Si dhe janë arrestuar në flagrancë tre shtetas dhe proceduar në gjëndje të lirë një shtetase .
Më konkretisht: Specialistët për Hetimin e Narkotikëve në Drejtorinë Vendore të Policisë Durrës në bashkëpunim me Prokurorinë e Rrethit Gjyqësor Durrës, pas një hetimi disa mujor ku janë përdorur metodat speciale të hetimit, gjatë ditës së djeshme në bashkëpunim me Forcën e Posaçme Operacionale në Drejtorinë e Përgjithshme të Policisë së Shtetit kanë finalizuar me sukses operacionin e koduar “Vazhdimësia”.
Në kuadër të këtij operacioni janë arrestuar në flagrancë shtetasit:
• Nderim Mona 52 vjeç, banues në Durrës;
• Arjan Abdyli 20 vjeç, banues në Durrës;
Gjithashtu ka filluar procedimi penal në gjendje të lirë në ngarkim të shtetases me iniciale:
• E.R. 31 vjeçe, banuese në Durrës.
Gjatë kontrollit fizik dhe në banesat e shtetasve të mësipërm u gjetën dhe sekuestruan në cilësinë e provave materiale:
• rreth 117 gr lëndë narkotike e dyshuar e llojit Heroinë, dhe 18 doza;
• 1 peshore elektronike;
• 40 000 lekë të reja;
• 11 aparate telefoni celularë.
Gjithashtu, po nga Specialistët për Hetimin e Narkotikëve në bashkëpunim me Efektivet e Komisariatit të Policisë Krujë, dhe Prokurorinë e Rrethit Gjyqësor Krujë është finalizuar dhe një tjetër operacion anti-cannabis i koduar “Mafsheq”, ku është arrestuar në flagrancë shtetasi:
• Lik Kabili 64 vjeç, banues në Krujë.
Gjatë kontrollit të ushtruar në banesën e shtetasit Lik Kabili dhe territorin përreth banesës së tij, Policia ka gjetur dhe sekuestruar në cilësinë e provës materiale:
• rreth 22 kg e 450 gr lëndë narkotike e dyshuar e llojit Cannabis Sativa, e ndarë në 5 thasë.
