Prokurori i Përgjithshëm, Adriatik Llalla pranon se provat për mbështetjen që iu dha Habilajve nga drejtuesit e Ministrisë së Brendshme janë në duart e Antimafias Italiane. Sipas Llallës “Hetimet e Antimafias Italiane, së fundmi, kanë siguruar të dhëna se grupe kriminale shqiptare kanë trafikuar drejt Italisë tonelata lënde narkotike kanabis ne shume raste kjo është realizuar dhe me mbështetjen e individeve qe kane per detyre goditjen e ketij krimi”.
Prokurori i Përgjithshëm e la të paqartë se kush ishin këta individë, por ai iu referua rastit Habilaj, duke pranuar se provat për mbështetjen e tyre janë në duart e italianëve.
Këto ditë, Ministri i Brendshëm Fatmir Xhafaj është në Itali, pas ngulmimit të tyre për t’i shkuar deri në fund rastit Habilaj. Nga ana tjetër, Haki Çako është në Shtetet e Bashkuara të Amerikës, për një takim me drejtues policie nga e gjithë bota. Në Shqipëri ka mbetur Saimir Tahiri që i ka shpëtuar për momentin arrestimit, por e ka të pamundur të udhëtojë jashtë vendit. Sipas asaj që deklaroi Llalla nuk dihet se për kë ekzistojnë provat e mbështetjes së krimit, për Haki Çakon, për Saimir Tahirin apo për të dy bashkë?
