Saimir Tahiri ka kaluar në kundërsulm total. Nga lotët dhe zëri i dridhur para dy netësh në Opinion, Tahiri ka kaluar tek përplasja e duarve në tavolinë, sfidimi i opozitës, madje edhe intimidimi i prokurores Elizabeta Ymeraj.
Ndërsa bërtiste për ndryshimin mes tij dhe pushtetarëve të PD-së, Tahiri u shpreh: "Unë nuk kam moralin tuaj. Unë nuk kam standartin që t'i them prokurores lavire".
Tahiri solli në Komision etiketimin që Berisha i bënte Ina Ramës pas 21 janarit, por ndërsa bërtiste për "lavire" në sallën e Komisionit të Mandateve, ai dukshëm ka tentuar të intimidojë prokuroren Elizabeta Ymeraj. Asnjë nga deputetët e tjerë në seancë nuk reagoi. Sot Tahiri nuk ka pasur nevojë për mbrojtjen e deputetëve të PS, pasi e ka marrë situatën nën kontroll në përballjen me prokurorët dhe opozitën.
