Kryetarja e Lëvizjes Socialiste për Integrim Monika Kryemadhi e ka cilësuar një ngjarje shumë të rëndë dhe rënie të parlamentarizmit, vendimin e sotëm të socialistëve për të mos lejuar heqjen e imunitetit të ish-ministrit të Brendshëm, Saimir Tahiri. Në një konferencë për mediat, Kryemadhi theksoi se Edi Rama sot ju përul frikës së tij më të madhe që ka të bëjë me mosdaljen e skandaleve të tjera.
“Sot mazhoranca votoi pro narkoqeverisjes. Për herë të parë pengohet prokuroria të bëjë punën e saj për të zbardhur në ngjarje kriminale. Narkoqeverisja, nuk ka hezituar të arrestojë qytetarët shqiptarë, tashmë bëhet bllok për të penguar prokurorinë. Rama i bëri shërbim frikës së tij të madhe, pasi zbardhja e kësaj çështjeje do të nxjerrë në dritë implikimin e Ramës dhe të të afërmve të tij. Nuk ka shqiptar të besojë dënglat e tij për reformën në drejtësi’, - deklaroi Kryemadhi.
