Mbështetës të ish-ministrit të Brendshëm, Saimir Tahiri janë mbledhur sërish përpara Kryesisë së Kuvendit. Këshilli i Mandateve dhe Imuniteteve do diskutojë sot në ditën e dytë kërkesën e Prokurorisë për heqjen e imunitetit të deputetit socialist i akuzuar për trafik droge dhe korrupsion pasiv të zyrtarëve të lartë shtetërorë.
Edhe një ditë më parë mbështetës të shumtë të Tahirit qëndruan për rreth 6 orë përpara Kryesisë së Kuvendit në pritje të vendimit për fatin e kryetarit të degës së PS për Tiranën. Diskutimet e një dite më parë u finalizuan pa asgjë konkrete për shkak se Prokuroria nuk paraqiti prova bindëse në ngarkim të Tahirit. Pretendimet e organit të akuzës u cilësuan të pamjaftueshme nga deputetët e maxhorancës. 
