Hetimet për grupin "Habilaj" nisën në vitin 2013 pas një të dhëne të re që doli në një tjetër operacion antiodrogë. Prokurorët vendosën ta ndiqnin këtë linjë dhe të mos i ndaheshin. Në vijim të hetimeve për shqiptarin Erson Zhuka që e kishte aktivitetin e tij në Raguza doli në dritë një lidhje e tij me shqiptarin tjetër Moisi Habilaj. U vu re se Habilaj ishte një grosist i madh i marijuanës që trafikohej nga Shqipëria.
Faza e parë e hetimeve ishte ajo prej shtator-tetorit 2013 deri në maj të 2015-ës. Në nisje hetimet nisën për Moisi Habilajn dhe Sabaudin Çelajn, por më pas u kuptua se bashkëpunëtorë të tyre ishin edhe Angelo Busacca, Antonio Riela, Florian Habilaj, Maridian Sulaj dhe Neizar Seiti.
Nga mbajtja nën mbikëqyrje e këtij grupi u bë e mundur sekuestrimi i 1650 kg marijuanë në 25.102013 në Augusta. Në 27.02.2014 u kapën 287.7 kg marijuanë në Palagonia. Në 29.7.2014 në Katania u sekuestruan 293.5 kg marijuanë . në datat 8-9 maj 2015 në Riposto u sekuestruan 880 kg marijuanë, 2 armë kallashnikov dhe një sasi municioni. Në total bëhet fjalë për sekuestrimin e 3687 kg marijuanë.
Po kur u mbyllën përgjimet?
Në bazë të raportit të plotë të prokurorisë së Katanias që lapsi.al e zotëron shihet se ai ka marrë vulat përfundimtare vetëm një javë më parë, në 12 tetor 2017. Po cili ka qenë përgjimi i fundit për të ashtuquajturin kreu i këtij grupi, Moisi Habiljan. Ai del për herë të fundit në përgjime në 22 shkurt 2017. Ai ndodhet në një makinë Fiat Panda bashkë me Nezar Seitin. Është ora 13:21 kur ata janë duke dëgjuar muzikë me zë të lartë dhe Seiti pyet: “Ti e hoqe këtë? (e ka fjalën për GPS-në e automjetit). Moisi Habilaj e pranon dhe qesh. “E hoqa dreqin”. “Ku e hodhe?” – e pyet sërish Seiti duke shtuar: “Mos e kanë gjetur ata?”. Moisiu e mohon: “Jo mooo”
Në 26 shkurt të këtij viti Moisi Habilaj e la Italinë dhe hetuesit nuk mundën më ta vinin në përgjim deri një javë më parë kur ai hyri sërish në Itali, por iu vunë prangat. ©LAPSI.al
