Ministri i Brendshëm Fatmir Xhafaj ka zhvilluar mbrëmjen e së shtunës një takim urgjent në komisariatin e Lushnjës. Burime në policinë e shtetit i thanë lapsi.al se Xhafaj ishte i shoqëruar nga Drejtori i Përgjithshëm i Policisë së Shtetit, Haki Çako. Të njëjtat burime thanë se Xhafaj ka qenë duke u kthyer nga Vlora ku është zhvilluar mbledhja e qeverisë kur është kthyer për një takim të paparashikuar në Lushnje. Ajo çfarë është thënë në takimin me drejtuesit e komisariatit është shumë e rezervuar, por lapsi.al mësoi se Xhafaj ka kërkuar angazhim maksimal për të zbardhur ngjarjet e fundit në këtë qytet. Sipas të njëjtave burime ministri i brendshëm ka kërkuar që sa më shpejt të vihen para drejtësisë autorët e vrasjes së dyfishtë të 11 tetorit ku u vranë 2 persona. Tonet e Xhafajt kanë qenë të larta duke paralajmëruar se do të ketë largime dhe ndekje penale për efektivët e policisë që janë të përfshirë në afera të pista. ©LAPSI.al
