Në të gjithë kampionatet europiane, përdorimi i video-asistentit (VAR) po komentohet mjaft pozitivisht pasi ka zgjidhur telashet e gjyqtarëve dhe po korrigjon gabimet e tyre. por për mesfushorin e Kombëtares shqiptare, Amir Abrashi, përdorimi i teknologjisë ka shëmtuar ndeshjet dhe lojtari i Fraiburgut nuk ka ngurruar ta shprehë hapur opinionin e tij.
“Është një m… i madh, nuk më pëlqen aspak. Me video-analizë çdo gjë është e ngadaltë dhe çdo faull duket shumë më i rëndë. Ravet nuk dëshiron t’i thyejë këmbën, ai është djalë i mirë. Kjo me video është një m… i madh”, - ishte komenti i Abrashit për të përditshmen gjermane “Kicker”.
Ai i referohej episodit të fundjavës në ndeshjen Fraiburg-Borusia Dortmund, ku shoku i tij i skuadrës, Ravet, u ndëshkua me të kuq pas një faulli kundër Shmelcer, të cilin gjyqtari e vlerësoi fillimisht si të denjë vetëm për karton të verdhë.
“Me 10 lojtarë ishte shumë më e vështirë ndaj një skuadre të tillë. Por e dinim se duke punuar në mbrojtje mund t’ia dilnim, gjëja kryesore ishte të mos pësonim”, - tha Abrashi i cili luajti 90 minuta në barazimin 0-0. /panorama/
