Uragani ‘Irma’ sapo ka mbërritur në Ishujt e Karaibeve. ‘Irma’ është klasifikuar si uragan i kategorisë së pestë. Kjo do të thotë se ai do të godasë Ishujt e Karaibeve me erëra me shpejtësi deri në 295 km/h dhe cilësohet si stuhia më e fuqishme e Atlantikut në dekadën e fundit. Autoritetet paralajmërojnë për efekte katastrofike.
Ishujt Leeward janë edhe pika fillestare nga ku uragani do të zbarkojë, për të vijuar më pas me Porto Rikon dhe Republikën Dominikane. Edhe shteti amerikan i Floridës ka urdhëruar evakuim të detyruar, pasi stuhia kërcënon të kalojë edhe atje. Banorët e ishujve i janë drejtuar dyqaneve për t’u furnizuar me mallrat për të përballuar uraganin.
Aeroportet në disa ishuj kanë ndërprerë aktivitetin, teksa autoritetet kanë nxitur njerëzit të strehohen.
Nuk është ende e qartë se çfarë efekti Uragani ‘Irma’ do të sjellë për pjesën kontinentale të Shteteve të Bashkuara, teksa pjesë të Teksasit dhe Luizianës po përballen me pasojat dhe dëmet e sjella nga uragani ‘Harvey’. /LAPSI.AL/
