Presidenti i Iranit, Hassan Rohani deklaroi sot se ato që shtyen Korenë e Veriut të testonte armët bërthamore ishin kërcënimet e SHBA-së.
“Pse Koreja e Veriut ka zgjedhur sot këtë rrugë që shqetëson njerëzit në Azinë lindore? Sepse ka pasur kërcënime kundër ekzistencës së Koresë së Veriut”, deklaroi presidenti në një fjalim para Këshillit të Ministrave.
Për Rohanin, kërcënimi me armë bërthamore është një çështje që duhet marrë shumë seriozisht.
“Ndonjërit mund t’i duket qesharake kur bëhet fjalë për armë bërthamore? Kur një vend është i pajisur me një armë bërthamore, loja që konsiston në kërcënimin e tyre kthehet në një lojë të rrezikshme për mbarë botën”, shtoi ai.
Sipas presidentit iranian, kësaj çështje i duhet dhënë zgjidhje vetëm nëpërmjet dialogut dhe negociatave.
“Ne mendojmë që kjo çështje duhet të zgjidhet nëpërmjet negociatave dhe dialogut”, nënvizoi Rohani.
Pheniani realizoi të dielën provën e gjashtë bërthamore, konsideruar më e fuqishmja. Sipas vendit komunist, bomba që u testua të dielën është e tipit bombë me hidrogjen. Kjo do të thotë se ajo krijon një shpërthim 10 herë më të madh se bombat atomike që u hodhën në Hiroshimë dhe Nagasaki në vitin 1945, që i dhanë fund përfundimisht luftës së dytë botërore.
Presidenti amerikan, Donald Trump kërcënoi regjimin koreano-verior të Kim Jong-Un për një përgjigje ushtarake masive. /LAPSI.AL/
