Ishte parashikuar të zgjaste 35-45 minuta, por takimi ballë për ballë mes Presidentit amerikan Donald Trump dhe “shefit” të Kremlinit Vladimir Putin shkoi më shumë se 2 orë. Në fund u mësua se palët ranë dakord për një armëpushim në jug-lindje të Sirisë që do të hyjë në fuqi të dielën në orën 12.00 me atë të Damaskut.
Megjithatë takimi mes të dyve ka qenë mjaft i tensionuar. Presidenti rus tha se ishte i lumtur të takonte personalisht homologun amerikan. Specialistët që komentojnë edhe atë që njihet si “gjuha e trupit” shkruajnë se Putin dukej nervoz në takim. Ai nuk e shihte në sy Trump dhe duart i mbante përgjithësisht të bashkuara, ndoshta për të fshehur ndonjë dridhje të pavullnetshme. Ai që inicioi shtrëngimin e duarve ishte kreu i Shtëpisë së bardhë që dukej më i lirshëm dhe i shpenguar.
“Kemi folur në telefon disa herë për çështje bilaterale dhe ndërkombëtare shumë të rëndësishme, por bisedat telefonike nuk janë të mjaftueshme” – tha Putin. "Nëse duam të zgjidhim çështje bilaterale dhe ato ndërkombëtare kemi padyshim nevojë të takohemi personalisht. Jam i lumtur që munda të takohem dhe shpresoj, siç tha dhe ai që takimi ynë të sjellë rezultate pozitive” – tha Putin.
Ajo që nxiste tension në këtë takim ishte një deklaratë e Trump pak ditë më parë se Moska ishte “agresive dhe destabilizuese”. /lapsi.al/
