Një tentativë e dështuar për korrupsion te Partizani përpara ndeshjes me Kukësin të mbyllur 1-1? Transkripti i një telefonate mes futbollistit të Partizanit Emiljano Vila dhe Drini Çaushit një menaxheri futbollistësh i afërt me klubin e Kukësit është botuar nga gazeta “PanoramaSport”. Ky person i ka kërkuar mesfushorit tolerim në fushën e lojës në këmbim të një kontrate më të mirë në Greqi. Telefonata e Vilës me Çaushin është regjistruar nga një tjetër person, por kjo video nuk bëhet ende publike. Në video dëgjohet se si ai i kërkon Vilës në mënyrë direkte që të jetë tolerues në fushë, pikërisht në ndeshjen e rëndësishme për titullin kampion. Madje, i ofron edhe para, duke përmendur emrin e drejtorit të Kukësit, “Naimi” dhe presidentit të klubit verior “Safeti”.
JA NJË PJESË E BISEDËS:
Menaxheri: O vllai, ti e di që unë të du fort. Ti nuk je më aty vitin tjetër. Do të marr unë këtu. Do lush me Korfuzin. Unë për ty e kam.
Vila: Ëhë…
Menaxheri: Kur ishim atë ditë në kafe, aty afër ishte edhe Naimi. Drejtori i Kukësit. Edhe ai foli me Safetin edhe ai tha sa të duan. A kupto. Me toleru pak. Jo me bo penallti, por kur të jetë topin në anësore, me e nxjerr jashtë. Me toleru pak. A kupto? Safeti është i fiksuar për ta marrë titullin sivjet. E do patjetër.
Vila: Hajt se flasim.
Menaxheri: Ti menoje ihere me qetsi dhe pastaj më thuj… Mos më jep përgjigje tani!
Vila: Ok, ok…
Menaxheri: Sepse vllai ti deri në fund të sezonit do të jesh aty, a kupto… se pastaj do ikësh…
Vila: Eee, po pra. Mirë hajt.
Menaxheri: Ki parasysh, se nuk dua të… thjesht tolerim, a kupto… nxirre topin jashtë e kshu gjojnash, e di vetë ti.
Vila: Hëm… ashtu ëëë…
Menaxheri: Nejse, menoje vetë edhe më thuj. Kur ta ndash mendjen më ço një mesazh. Domethënë kur të jesh vetëm, më ço një mesazh… kaq. Mirë?
Vila: Eeee… hajt se flasim. Hajt, hajt se flasim.
I pyetur nga gazeta menaxheri e ka mohuar bisedën duke thënë se me Vilën ka folur vetëm për çështje private. Klubi i Kukësit e ka mohuar gjithashtu bisedën ndërsa nga Partizani nuk ka ende reagim.
