Britania do të humbasë tregun numër 1 në botë dhe ekonominë e dytë më të madhe të globit. Ky është arsyetimi i Federica Mogherinit në lidhje me shkëputjen e Britanisë nga BE, pas nisjes së procedurave të Brexit.
Duke i cilësuar si “miq”, Mogherini i bashkohet zyrtarëve të lartë të unionit, si Presidenti i Këshillit Europian, Donald Tusk i cili thotë se BE-së do t’i mungojë Britania dhe anasjelltas.
Për të balancuar deri diku qëndrimin ndaj largimit të Britanisë, Mogherini shtoi se lidhur me kontributet e anglezëve në operacionet ushtarake, BE mund të jetojë edhe pa ta.
“Kam frikë se miqtë tanë britanikë do të dalin më të humbur se ne nga kjo lëvizje, sepse edhe pas largimit të Britanisë, Bashkimi Europian do të vazhdojë të mbetet tregu numër 1 në botë dhe ekonomia e dytë më e madhe e globit. Disa mund t’i referohen dhe sigurisë e mbrojtjes. Është e vërtetë, Mbretëria e Bashkuar është një lojtar shumë i rëndësishëm kur vjen fjala tek kjo çështje, por kontributi i anglezëve në operacionet tona ushtarake nuk është më shumë se 5%. Mund të jetojmë edhe pa të”, tha përfaqësuesja e lartë e BE-së për Çështjet e Jashtme dhe Politikën e Sigurisë.
Federica Mogherini e bëri këtë deklaratë gjatë një fjalimi në Universitetin Tsinghua të Pekinit. /LAPSI.AL/
