Kryeministrja britanike, Theresa May bëri sot thirrje për zgjedhje të parakohshme në Mbretërinë e Bashkuar, duke propozuar datën 8 qershor.
“Kam arritur në përfundimin se mënyra e vetme për të garantuar stabilitet dhe siguri për vitet e ardhshme është mbajta e këtyre zgjedhjeve”, tha liderja britanike, duke shpjeguar vendimin për zgjedhje të parakohshme.
May bëri njoftimin në “Downing Street”, pasi disa muajsh sondazhesh të favorshme për konservartorët britanikë.
Njoftimi erdhi menjëherë pas takimit të Kryeministres britanike me kabinetin e saj qeveritar.
Duke iu referuar Brexit-it, May tha se Britania është e bashkuar, por jo parlamenti. Lidhur me këtë deklaratë, kjo kërkesë e papritur e May-t i ngjan më shumë me një plan të sajin për t’u “fuqizuar” në parlament. Fundja, sondazhet janë pro partisë së saj.
(Parlamenti Britanik)
Më herët, May kishte thënë se zgjedhjet e ardhshme do të ishin sipas planit, pra në vitin 2020. Në referendumin e qershorit 2016, 52% e qytetarëve britanikë i thanë “Po” daljes së vendit nga Bashkimi Evropian, ndërsa pas kësaj kryeministri David Cameron dha dorëheqjen për t’u pasuar nga Theresa May. /LAPSI.AL/
