Presidenti i Turqisë deklaroi se Europa do të paguajë për atë që ka bërë kundër popullit turk. Ai e quajti Europën si të “sëmurë”, i njëjti term që përdorej nga politikanët europianë për të përshkruar rënien e Perandorisë Osmane përgjatë shkeullit të 19-të.
“Një shekull më parë thanë se ne ishim “i sëmuri i Bosforit”. Tani Evropa është e sëmurë, Evropa po shembet”- tha presidenti Erdogan, gjatë një fjalimi që mbajti në Izmir.
Marrëdhëniet mes Turqisë dhe Bashkimit Europian janë tensionuar që kur Holanda dhe Gjermania ndaluan disa tubime të ministrave turq, të cilët dëshironin të merrnin mbështetjen e diasporës turke për referendumin që pritet të ndryshojë kushtetutën në favor të Erdoganit më 16 Prill.
Marrëdhëniet u tensionuan edhe më shumë kur Holanda detyroi ministrat turq që kishin ardhur në këtë vend, të kthehen në Turqi. Ndërsa në Zvicër u zhvilluan protesta kundër Erdogan, ku u shfaq edhe një pankartë që ilustronte vrasjen e Presidentit Erdogan.
Këto ngjarje irrituan keq Presidentin turk, i cili shpërtheu në akuza ndaj këtyre vendeve, duke akuzuar Berlinin për “praktika naziste”, ndërsa Holandën për “fashizëm” dhe “mbetje naziste”. /LAPSI.AL/
