Vdekja e papritur e ambasadorit rus në OKB, Vitaly Churkin duket se ka shqetësuar Departamentin Amerikan të Shtetit, që ka udhëzuar shefin e Departamentit të Mjekësisë Ligjore në Nju Jork të mos publikojë shkaqet e vdekjes së ambasadorit rus në Kombet e Bashkuara Vitaly Churkin.
Në një letër dërguar Zyrës Ligjore të Nju Jorkut, Misioni Amerikan në OKB njoftonte se qeveria ruse ishte ankuar për deklaratat e bëra në lidhje me ekzaminimin mjekësor të zotit Churkin.
Zyra e Mjekësisë Ligjore deklaroi se detajet e vdekjes do të trajtohen në përputhje me ligjin ndërkombëtar.
“Imuniteti diplomatik i ambasadorit Churkin mbetet në fuqi pavarësisht vdekjes së tij”, thuhet në një deklaratë të Mjekësisë Ligjore.
Ndërkohë, një burim i Departamentit të Shtetit ka thënë për BBC, se rezultatet e autopsisë nuk do të publikohen në kuadër të një marrëveshjeje të arritur mes SHBA dhe OKB-së.
Churkin vdiq papritur në zyrën e tij në Nju Jork muajin e kaluar.
Churkin kishte shërbyer si ambasador në Kombet e Bashkuara që prej vitit 2006. Shkaqet e vdekjes së tij mbeten ende të paqarta. /LAPSI.AL/
