Mërgim Mavraj vijon të konfirmojë formën optimale që po kalon në kampionatin gjerman. Revista e njohur “Kicker” në versionin online e ka përfshirë mbrojtësin e kombëtares shqiptare në formacionin më të mirë të javës në Bundesligë, teksa me ndihmën e 31 vjeçarit kuqezi aktualisht Këlni mban vendin e dytë.
Mërgim Mavraj e ka përmbushur plotësisht shprehjen, të kthehesh më i fortë se më parë. Dëmtimi i pësuar vitin e shkuar që e la jashtë pothuajse për të gjtihë sezonin tashmë është hedhur pas krahëve dhe mbrojtësi i kombëtares shqiptare po vërteton se për momentin është një ndër mbrojtësit më të mirë në kampionatin gjerman.
31 vjeçari u tregua edhe një herë i pagabueshëm në takimin e kësaj jave ku Kolni mposhti 2-1 Ingolstadin. Një fitore e cila i mundësoi ngjitjen në vendin e dytë skuadrës së drejtuar nga Peter Stroger.
Paraqitja mjaft e mirë e Mavrajt ka marrë edhe vëmëndjen e mediave gjermane dhe revista e njohur “Kicker” në versionin online e ka rreshtuar futbollistin kuqezi në formacionin më të mirë të javës së 7-të në Bundesligë.
Në fakt mbrojtësi që nga fillimi i këtij edicioni ka shfaqur një formë të admirueshme, ç’ka e ka treguar edhe në ndeshjet e skuadrës kombëtare, ku gabimet personale të tij kanë qënë të pakta.
Ndërkohë që në skuadrën e javës në Gjermani ishin përfshirë edhe 3 lojtarë të tjerë të Kolnit, mbrojtësi i majtë Hector, mesfushori Risse dhe sulmuesi Modeste.
Ndërsa ditën e djeshme e përditshmja zvicerane “Blick” e cilësoi Taulant Xhakën si një ndër lojtarët më të evindetuar të javës duke e vendosur në formacionin më të mirë./ora news
