Armand Duka ka qenë i sinqertë në lidhje me çështjen “Ergys Kaçe”. Mesfushori i Kombëtares së Shqipërisë ka thënë se nuk do të vijë në Kombëtare deri sa të jetë trajner De Biasi.
“Ka diçka të vërtetë. Nuk është gjithçka e pavërtetë në atë që është raportuar. Media, ndoshta edhe për faktin që ka pak aktivitete, lajmin e nxjerr vetëm nëpërmjet këtyre futbollistëve. Megjithatë, është e vërtetë. Nuk besoj se ka një futbollist në botë, nuk ka asnjë sipas meje që të presë me kënaqësi atë vendim të trajnerit për të qëndruar në tribunë. Sidomos në Kombëtare, ku futbollisti vjen për të luajtur dhe për të treguar talentin. Një nga këto është edhe Kaçe, që është talent i madh. Ia kam thënë Ergysit edhe De Biasit. Gjithsesi, trajnerë të ndryshëm, duan lojtarë të ndryshëm. De Biasi nuk e ka preferuar shumë atë lojtar, por nuk mund të them që ka pasur konflikt. Trajneri e ka thirrur për ta sqaruar teknikisht pse duhet të ishte në tribunë. Ai është lojtar shumë i mirë. Një kualitet shumë i mirë dhe jam i bindur që do ta ndihmojë Kombëtaren në të ardhmen”, - deklaroi Duka.
