I shpërfytyruar nga humbja me Spanjën dhe i dëshpëruar nga dy golat, trajneri italian Xhani de Biazi u shfaq në Televizionin Publik Shqiptar për një intervistë pas ndeshjes. Çuditërisht, foli për një lojë të mirë të kuqezinjve, megjithëse skuadra ishte dukshëm në një formë të keqe. Tekniku përsëriti pak a shumë të njëjtën gjë në pyetjet që iu bënë. Tha se “pjesën e parë skuadra luajit mirë dhe i rezistoi sulmit spanjoll. Në pjesën e dytë erdhi gabimi, goli i parë dhe pastaj ai i dytë”. Dhe ndërsa përkthyesi po shpjegonte fjalët e tij, De Biazi u largua, duke lënë në mes intervistën. Këtë largim të papritur të italianit, në studion e TVSH e kaluan me sportivitet, por italiani ishte dukshëm i stresuar, ndërsa herë pas here fërkonte fytyrën dhe i dilnin disa grimasa nervoze.
