Gazeta Shqiptarja.com është paditur për shpifje të qëllimshme në gjykatën e Tiranës. Padia është bërë në emër të "Free and Fair Media Group" ( Gazeta Shqiptarja.com), e cila është përfaqësuar në gjyq nga nga Drejtoresha e Përgjithëshme Znj. Alba Malltezi, bashkëshorte e Carlo Bollinos. Gazetës Shqiptarja.com i kërkohet të paguajë një dëm jo material nga Avni Koldashi, për shpifje të qëllimshme dhe mostërheqje të akuzave sipas kërkesës së paditësit Koldashi, në shumën 10.000 ( dhjetëmijë) Euro si dhe pasojat te tjera ligjore që parashikojnë ligjet përkatëse. Çështja është regjistruar në gjykatën e Tiranës më 14.09.2016 dhe do të gjykohet nga gjyqtari Altin Shkurti. Seanca është parashikuar më 14.10.2016. Avni Koldashi ka qenë i akuzuar si një nga rrëmbyesit e biznesmenit kosovar Remzi Hoxha. Pas një procesi të gjatë gjyqësor ai mori pafajësi nga Gjykata e Krimeve të Rënda. Pak muaj para padisë, në një nga shkrimet e saj, Shqiptarja.com e quante Koldashin “rrëmbyesi i Remzi Hoxhës”, ndonëse ai kishte marrë pafajësinë në gjykatë. Ky nuk është rasti i parë kur Shqiptarja.com akuzohet për shpifje të qëllimshme, ndonëse jo në gjykatë.
Rasti më i fundit ishte ai i falsifikimit të firmës së Ben Blushit. Shqiptarja.com paraqiti një dokument për të thënë se Blushi kishte firmosur marrëveshjen me kompaninë Albanianbeg Ambient të Francesco Becchetti-t për të lejuar importin e plehrave në Shqipëri, në vitin 2004 kur ai ishte ministër i Pushtetit Vendor (lexo më poshtë në rubrikën lajme të Lapsi.al). Por firma, rezultoi e falsifikuar dhe lapsi.al botoi dokumentin zyrtar që mbante firmat e dy ministrave të tjerë të qeverisë Nano, Bashkim Fino dhe Ethem Ruka. /Lapsi.al
