Mbyllet me rrjeta të paprekura derbi i 146-të mes Partizanit dhe Tiranës. Në “Elbasan Arena”, dueli mes dy rivalëve kryeqytetas pati lojë me ritëm dhe plot raste, por goli mungoi. Pas një pjese të parë të ekuilibruar, në të dytën Partizani ishte më i rrezikshëm, nisur edhe nga një rënie fizike e bardhebluve. Një shtyllë, një traversë dhe pritjet e Ilion Likës e ruajtën të paprekur portën e Tiranës, ndërsa edhe në krahun tjetër Alban Hoxha u shfaq vendimtar në rastet që iu paraqitën. Ndeshja e dhjetë radhazi pa humbje ndaj “kushërinjve” e ngjit Partizanin në kuotën e 8 pikëve, -4 nga Skënderbeu kryesues. Të kuqtë mund të ngushëllohen me faktin që mbeten të pamposhtur në katër javët e para, ende pa pësuar gol. Kurse për Tiranën kjo është pika e katërt, aq sa ka edhe Flamurtari./panorama/
