Pas publikimit nga UEFA të fakteve tronditëse se kampionët e shumfishtë të Skënderbeut kanë qenë arkitektët e një skeme të tmershme trukimi ndeshjesh kanë reaguar rivalët e drejtpërdrejtë të korçarëve, Partizani dhe Kuksi, të cilëtë kanë kërkuar rikthimin e titujve kampionë.
Një ditë më parë
UEFA publikoi arsyet se pse ka dënuar Skënderbeun me 1 vit jashtë Kupave të Evropës, duke zbuluar se ekipi korçar kishte manipuluar ndeshjet si në Evropë, ashtu edhe në kampionatin shqiptar.
Sipas këtij raporti Skënderbeu ka qenë i përfshirë vazhdimisht në aktivitete manipulimesh rezultatesh në ndeshje kombëtare dhe ndërkombëtare në 6 vitet e fundit.
Raporti arrin në konkluzionin se 41 ndeshje janë manipuluar për qëllime fitimit të paligjshëm nëpërmjet basteve (5 ndeshje të Ligës së Kampioneve, 2 ndeshje të Europa League, 41 ndeshje të Kampionatit Shqiptar dhe Kupës së Shqipërisë si dhe 6 ndeshje miqësore), shkruhet ndër të tjera në argumentimin e UEFA-s.
Dhe pas këtij skandali të padëgjuar në futbollin shqiptar kanë rreaguar edhe rivalët direktë. Në një komunikatë të publikuar në faqen e saj Partizani kërkon rikthimin e titullit.
“Pasi lexuam me vëmendje të gjithë vendimin e argumentuar të Komisionit të Apelit në UEFA dhe duke ditur që CAS e ka lënë në fuqi, klubi i Partizanit shpreh keqardhjen që trukimi i ndeshjeve ka marrë përmasa të tilla në futbollin shqiptar” thuhet në komunikatë. Aty vazhdohet:
“Për aq kohë sa UEFA na njohu si kampionë të Shqipërisë, që na cilësoi si të denjë për të marrë pjesë në Champions League, do ishte e nevojshme që edhe organi që drejton futbollin në Shqipëri, FSHF, të mbante një qëndrim.
Ose të bëhej palë me klubin që ka trukuar disa ndeshje sezonin e kaluar (faktuar nga të gjitha organet gjyqësore sportive), ose të distancohej dhe të merrte masat e caktuara ndëshkuese, siç e përcakton rregullorja e këtij sporti” thuhet në komunikatë e. Klubit Partizanit ku theksohet se ai “nuk kërkon asnjëherë trofe të padrejtë, por kërkon drejtësi”. Edhe presidenti i Kuksit Gjici
i pyetur nëse Kukësi do të ndërmarrë një çështje ligjore për të kërkuar titujt në tavolinë për shkak se disa vite është renditur i dyti pas Skënderbeut, ka thënëë: “Këto janë vendime që i përkasin UEFA-s dhe Federatës Shqiptare të Futbollit. Nëse ata do të marrin vendimet për të na dhënë ndonjë titull ne e mirëpresim, nëse nuk i marrin…
Ne nuk kemi asgjë në dorë sepse institucionet vendosin për fatin e kampionateve. Edhe po ta kërkojmë ne titullin, ata mund të refuzojnë. Unë dua që titujt t’i marr në fushën e lojës dhe me futboll të pastër. Nëse titulli merret me hile, hilet dalin më vonë si tani” tha Gjici.
Por pavarësisht nga kërkesat e dy klubeve federata deri më tani ku ka dhënë asnjë përgjigje, dhe as një prononcim për skandalin e Skënderbeut. Ajo është mjaftuar me argumentin se nuk e ka të zbardhur Vendimin e gjykatës së KAS që la në fuqi vendimin e UEFA-së për penalizimin e Korçarëve. (Lapsi.al)
