“Siç kanë shkruar shkencëtarët osmanë, turqit janë barbarë, mohues të zotit, mashtrues dhe të pistë. Turku është si një qen, që hiqet si i egër. Por ia mbath kur duhet të përballet me armikun. Rruga e vetme me efektive për t’u përballur me turqit është grushti dhe vendosmëria”
Është kjo deklarata që bëri të mërkurën gjatë një seance në Parlamentin Europian, eurodeputeti grek i partisë së ekstremit të djathtë “Agimi i Artë” Elefterios Sinadinos. Një deklaratë, që ngjalli reagime mjaft të ashpra në sallë dhe që detyroi kreun e Parlamentit Europian, Martin Shulc të marrë masa ndaj tij.
Shulc vendosi t’a përjashtojë Sinadinosin nga punimet e seancës, ku diskutohej për krizën siriane dhe bashkëpunimin mes Bashkimit Europian dhe Turqisë për këtë çështje. Madje urdhëroi truprojat e Parlamentit Europian të shoqëronin jashtë salle, pasi eurodeputeti ekstremist grek nuk iu bind menjëherë urdhërit për të dalë.
Martin Shulc tha se vendimi për të dëbuar nga salla një eurodeputet, ishte i pashmangshëm dhe u bë për të ruajtur dinjitetin e institucionit. Deklarata e tij me tone raciste, sipas Shulc është kundër parimeve europiane të bashkëjetesës. Megjithatë, rrallë herë në parlamentin europian janë marrë masa të tilla ekstreme. Një rast i ngjashëm ishte në vitin 1988 kur një eurodeputet protestant nga Irlanda e Veriut u nxor nga salla pasi kritikoi ashpër Papa Gjon Palin e Dytë. Ndërsa në vitin 2010, deputeti britanik Godfrej Blum u dëbua pasi etiketoi kreun e parlamentit Martin Shulc, si nazist.
