Duke sfiduar me cinizëm 1 milionë votat që e rrëzuan nga pushteti dy vite më parë, Sali Berisha ia ka përplasur sot kundërshtarëve socialistë, duke i thënë se ata vazhdojnë të jetojnë në kohën e tij. Përpos mendësisë moniste të Berishës, që e lidh një kohë me emrin e politikanit që udhëheq, përpos faktit se ai i referohej deputetëve dhe kryeministrit që merren gjithë kohën me të, ai ka të drejtë. Fatkeqësisht, jetojmë ende në kohën e Sali Berishës.
Jetojmë në kohën e tij, sepse sot nuk ka fajtorë për të vrarët e 21 janarit.
Jetojmë në kohën e tij, sepse gjysma e qeverisjes është ajo që ka qeverisur mandatin e dytë të PD-së.
Jetojmë në kohën e tij, sepse biznesmeni i Gërdecit, si pasojë e gafave të të cilit u vranë 26 vetë, sot si pakukush është në klientët e zgjedhur të Edi Ramës, të cilit i firmos leje ndërtimi.
Jetojmë në kohën e tij, sepse firma e Berishës për të shkatërruar Lagunën Blu, sot përdoret si alibi nga pasardhësi i zhytur më keq në korrupsion.
Jetojmë në kohën e tij, sepse Rama nuk pati forcë ti shkojë deri në fund vjedhjes në CEZ-n pasi u kap edhe vetë.
Jetojmë në kohën e tij, se sot shumë nga koncesionet e klientëve të pushtetit të djeshëm që u tha se do të rishikoheshin, po vazhdojnë të mbretërojnë.
Jetojmë në kohën e tij, sepse sot paratë e tenderave të pushtetit i marrin ose miqtë e Ramës ose miqtë e Berishës që rrinë gjithnjë në oborrin e kryeministrit.
Prandaj Berisha ka të drejtë të tallet. Prandaj ai mund të luajë me bandën e deputetëve të së majtës duke i thënë se mbetet obsesioni I tyre.
Ne jetojmë në në kohën e Berishës sespse ai jo vetëm është shëndoshë e mire, pas të gjitha krimeve që bëri, por ai vazhdon të ketë ende një pjesë të madhe të pushtetit ekonomik, që e thuri me aq mjeshtëri familja e tij.
Ne jetojmë në kohën e tij, sepse një milionë shqiptarët që votuan kundër, u treguan fare moskokëçarës për të menduar se duke shkulur atë, po e zëvendësonin fatëkeqësisht me një kopje të ngjashme. E në këtë rast, tani Berisha nuk tallet më me Ramën. Por me këta një milionë shqipëtarë që kujtuan se po ndryshonin historinë. /Lapsi.al/
