Francesco Becchetti ka rrëfyer më në fund se nga vijnë 40 milionë eurot që ai thotë se investoi në Agon Channel. Në hapjen e televizionit ai pati deklaruar se asnjë cent nga 40 milionë eurot nuk kishte marrë borxh në banka. Shumëkush pyeti se nga vinte kjo shumë e madhe parash. U desh hetimi i prokurorisë së Tiranës për të kuptuar burimin e tyre. Vetë Becchetti në një intervistë për La Repubblica tregon më në fund se ku e gjeti shumën për të ndërtuar Agon Channel dhe për të sjellë në Shqipëri disa prej figurave më të njohura të televizionit italian, me kosto tepër të lartë për standardet shqiptare.
“40 milionët që u përdorën për të financuar Agon Channel vijnë nga një prej bankave më të mëdha në Europë. Nuk është financim, por rezultat i zgjidhjes së një marrëveshje mes njërës prej kompanive të grupit tim dhe bankës. Nuk mund ta them emrin e saj, por në total nuk janë më shumë se 16 transferta”, është shprehur italiani që është shpallur në kërkim për pastrim parash.
Historia e zgjidhjes së marëveshjes me bankën ka të bëjë me Deutche Bank. Hetimet e prokurorisë shqiptare zbuluan se për ndërtimin e hidrocentralit të Kalivaçit ai kishte krijuar një kompani me Deutche Bank, të quajtur Hydro srl. Në Shqipëri ata krijuan shoqërinë KGE (Kalivaci Green Energy) me capital të përbashkët 150 milionë euro. 55 përqind i kishte kompania BEG e Becchettit dhe 45 % Deutche Bank.
KGE lidhi një kontratë për mbikqyrjen e punimeve me shoqërinë “Energji” që ishte në pronësi të mamasë së Becchettit, Liliana Condomiti. Prokuroria ka sqarur zyrtarisht se këtu ka nisur zbatimi i skemës së pastrimit të parave. Kompania e nënës së Becchettit, punimet që blinte nga nënkontraktorët, ia shiste kompanisë së të birit dhe Deutche Bank me cmime deri në 23 herë më të lartë dhe arriti një fitim prej 16 milionë eurosh, me para që i merreshin me anë të mashtrimit Deutche Bank.
Veç kësaj, në 2013 KGE dhe Energji krijojnë një mosmarrëveshje fiktive dhe shkojnë në arbitrazh. Prokuroria thotë se me anë të dokumentave të falsifikuara, Energji e fiton arbitrazhin dhe KGE duhet t’i paguante 50 milionë euro.
A janë këto paratë për të cilat flet Becchetti? Në të vërtetë ai arrin t’i marrë Deutche Bank edhe 150 milionë euro të tjera nga zgjidhja e kontratës mes tyre. Ky duket se është edhe burimi i parave që italiani investoi në Agon Channel. E gjithë skema e përfitimit të tyre, sipas prokurorisë shqiptare, është një skemë mashtrimi për pastrim parash. Për këtë arsye 60 % të aksioneve të Becchettit në Agon Channel janë sekuestuar dhe televizioni rrezikon të mbyllet. Lapsi.al
