Dy ndeshje miqësore të luajtura javën e shkuar në Spanjë mund të jenë trukuar. Njëra prej tyre është ajo mes ADO Den Haag dhe Skënderbeut, të luajtur në Estepona. Gazeta hollandeze Volkskrant shkruan se dyshimet janë hedhur nga “eskpertë të basteve sportive” dhe nga informacione të marra nga Qendra Ndërkombëtare për Sigurinë në Sport. Ndeshja tjetër është ajo mes Heerenveen dhe Standard Luik, e luajtur në Nurcia. ADO Den Haag e fitoi të enjten ndeshjen me Skënderbeun me rezultatin 2 - 0, me gola të shënuar 15 minuta përpara përfundimit. Një ish -ekspert i UEFA -s i ka thënë gazetës hollandeze se “këto ndeshje ishin normale deri në mbyllje të pjesës së parë. Më pas, u vunë shumë baste për golat e hollandezëve. Përfundimisht kjo është një ndeshje e dyshimtë”. Qendra Ndërkombëtare për Sigurinë në Sport thotë se një duzinë ndeshjesh miqësore në jug të spanjës janë manipuluar nga një sindikatë bastesh, që organizon miqësore mes klubeve në jug të vendit. “Janë prekur veçanërisht klube të huaj që po stërviten në Spanjë”, i tha gazetës zëdhënësi i Qendrës Ndërkombëtarë për Sigurinë në Sport, Javier Mena.
E njëjta kompani mund të ketë organizuar edhe ndeshjen e ADO Den Haag. Në ndeshjet miqësore rezultatet fiksohen shpesh, për shkak se rezultati nuk ndikon në klasifikim dhe lojëtarët e kanë më të lehtë ta shesin ndeshjen kundrejt pagesave në para. Gazeta thotë se është me e thjeshtë për të tilla ndeshje të gjesh një gjyqtar të korruptuar. Ndeshja mes Heerenveen dhe Standard Luik u ndërpre kur lojëtarët hollandezë e braktisën atë, për shkak se u zemëruan kur gjyqtari vendosi që penalltia e katërt të gjuhej sërish. Tre penalltitë e tjera që i dhanë ishin të dyshimta, shkruan gazeta Volkskrant.
