Zbulimi i vitit të kaluar në Kombëtaren shqiptare të futbollit, Ermir Lenjani, ka gjetur skuadër të re. Ai ka kaluar testet mjekësore te skuadra franceze, Rennes, me të cilën nënshkroi sot kontratën. Lenjani kaloi te Rennes nga klubi zviceran, St Gallen. Në prezantimin e tij te kjo skuadër, Lenjani u shpreh i lumtur me mundësinë që iu dha. “Ky është një hap para për karrierën time. Gelson Fernandes dhe Pedro Henrique më kanë thënë shumë për klubin dhe qytetin. Unë e di se Ligue 1 është një kampionat shumë i vështirë dhe do ta jap më të mirën nga vetja” - deklaroi Lenjani. Në anën tjetër, Philippe Montainer, trajner i Rennes, theksoi se skuadra e tij ka marrë një lojtar tejet me përvojë. “Ne e kemi parë nga afër paraqitjen e Lenjanit në ndeshjen Francë - Shqipëri. Ai është një lojtar i mësuar me gara të nivelit të lartë” - u shpreh Montanier.
