Disa fotografi të shpërndara në “Instagram” ku shihet Granit Xhaka me vëllanë Taulantin dhe lojtarët e KF Prishtina duke bërë shqiponjën me duart e kryqëzuara, kanë mjaftuar që portali “blick.ch” në Zvicër dhe “kurim.rs” në Serbi ta kthejnë vëmendjen te “skandali i dronit” i mbyllur para afër dy muajve.
Siç është shkruar dhe komentuar gjerësisht gjesti i bërë nga Granit Xhaka dhe nga Pajtim Kasami (ndaras dhe në vende të ndryshme) pati nxitur krerët e përfaqësueses zvicerane që t’u sugjerojnë lojtarëve me prejardhje shqiptare të heqin dorë nga shenja e shqiponjës.
“Jashtë kombëtares ne nuk mundemi dhe as nuk duam të kontrollojmë secilin lojtar 365 ditë në vit. Nëse dikush do të duhej të vepronte, atëherë do të mund të ishin klubet ku ata luajnë, në rast se nuk pajtohen me këtë gjest. Me fanellat e kombëtares, askush nuk do të festojë duke bërë shqiponjën” - ka thënë zyrtari i federatës zvicerane, Peter Sadelman. Ndërsa serbët e kanë konsideruar si një provokim të radhës.
