Derbi i kryeqytetit që luhet të hënën pasdite mes Partizanit dhe Tiranës mund të luhet me praninë e të dy tifozerive. Kjo mundësi u la e hapur nga vetë Presidenti i Federatës Shqiptare të Futbollit Armand Duka sipas të cilit një gjë e tillë është e mundur derisa Komisoni i Apelit pranë FSHF-së nuk është mbledhur të japë një vendim të formës së prerë. I pyetur nga gazetarët Duka u shpreh: “Nëse Apeli nuk është mbledhur akoma, dënimi i tifozëve të Tiranës mund të marrë formë të prerë pas mbledhjes së Komisionit të Apelit që ndoshta mund të jetë edhe javën tjetër”.
Ishte Komisioni i Disiplinës që ndëshkoi me përjashtim me 6 ndeshje tifozerinë e bardheblu kur ekipi është udhëtues pas incidenteve në takimin me Elbasanin, ndërsa klubi e apeloi vendimin.
Menjëherë pas kësaj deklarate të kreut të FSHF-së, klubi i Futbollit “Tirana” ka përshëndetur deklaratën e bërë duke u shprehur se do të jetë bashkëpunuese për mbarëvajtjen e këtij takimi. Derbi i Kryeqytetit do të luhet të hënën në ora 18:00 në stadiumin “Qemal Stafa”./lapsi.al/
