Ishte gusht, kur Stuttgarter Kickers i kategorisë së tretë gjermane përballej me Borussian e Dortmundit, dhe humbja 1-4 nuk ishte ndonjë çudi e madhe. Çudi ishte fakti që një mesfushor 19-vjeçar i tyre ra në sytë e Jürgen Klopp, trajnerit të Dortmund. Fjala është për Besar Halimin, djaloshin shqiptar që nuk e keni dëgjuar më parë, por do e dëgjoni shpesh tani e tutje.
Mesfushori 1.69 m i gjatë nuk ka rënë vetëm në sytë e Klopp. Me 2 golat e 10 asistet e tij në 18 ndeshje këtë sezon, ai ka tërhequr vëmëndjen dhe të zbuluesve të Benficës së Lisbonës. Ekipi i njohur për gjuetinë e talenteve ka kryer kontaktet e para zyrtare me Halimin, gjë që konfirmohet dhe nga agjenti i tij Arthur Beck. “Mund ta konfirmoj interesin e Benficës.
Sigurisht nuk e përjashtoj dhe mundësinë e rinovimit për një vit me Stuttgarter Kickers”, – tha Beck. Kontrata e tij skadon në qershor, çka ka vënë dhe Borussiën e Dortmundit në alarm për të nxituar për firmën e tij. Nuk ndodh shpesh të jesh preferencë e Klopp.
Lufta mes dy klubeve pritet të bëhet e nxehtë në ditët që vijnë, pasi nga janari, Halimi ka të drejtë të firmosë parakontratë me njërin nga klubet. Kush do e bindë më shumë? Nga ana tjetër, është dhe Federata Shqiptare me Gianni de Biasin që duhet të vihen në alarm për të.
Halimi ka luajtur vetëm një ndeshje me u19 e Gjermanisë përpara 2 vitesh, por nuk është grumbulluar më që atëhere. Rast i artë për Shqipërinë për të rrëmbyer një lojtar që po bie ngadalë në sytë e Europës./asport.info/
