Trajneri i kombëtares shqiptare, Gianni de Biasi ka reaguar ndaj pakënaqësisë së futbollistit Alban Meha dhe trajnerit të tij të Paderbornit në Bundesligë. De Biasi ka dhënë arsyet se përse Meha nuk është thirrur për dy miqësoret kundër Francës dhe Italisë, duke evituar polemikat si me mesfushorin kosovar që ka mbetur i habitur nga vendimi i italianit, ashtu dhe me teknikun e Paderbornit që është befasuar se si futbollisti i tyre ka mbetur jashtë ekipit, pasi tani gëzon formë të mirë.
”Kur kanë kaluar 11 ndeshje nga kampionati gjerman, Meha nuk ka luajtur në 5 të parat, ndërsa në të gjashtën u aktivizua vetëm 12 minuta. Kur e grumbullova për Danimarkën dhe Serbinë e kuptova që nuk ishte në kondicionin e duhur fizik”, ka deklaruar De Biasi.
“Tani po luan në vazhdimësi dhe ka shënuar një gol por nuk besoj se është në gjendje të mirë me vetëm 150 minuta aktivizim. Meqë këto janë dy miqësore mendova për të mirën e klubit, lojtarit dhe kombëtares, por dikush te Paderborn është ankuar. Gjithsesi ky është problemi i tyre”, theksoi ai.
