Drejtuesit e futbollit shqiptar të mërkurën në darkë në emisionin "Opinion" shprehen mendimin e tyre të sigurtë se Serbia do të dënohej për atë që ndodhi në Beograd. Ata u shprehën të bindur gjithashtu se anjë nga futbollistët shqipëtarë nuk do të penalizohej sepse të gjitha veprimet e tyre kishin qenë një mbrojtje ndaj agresionit. Por jo të gjithë mendojnë kështu. Sipas gazetës sportive madrilene, AS, edhe Shqipëria mund të përjashtohen nga eliminatoret pas incidentit në Beograd.
Komiteti i Disiplinës i UEFA-s do të mblidhet në Zvicër për të analizuar raportin e gjyqtarittë ndeshjes Serbi-Shqipëri, Martin Atkinson, dhe atë të delegatit të ndeshjes, Harry Been.
Por, vendimi për ngjarjet e mbrëmjes së 14 tetorit do të merret më 23 tetor dhe mund të jetë shumë i rëndë jo vetëm për organizatorët e ndeshjes.
Sipas gazetës spanjolle sportive "AS", do të ketë ndëshkime shembullore për të dyja kombëtaret pas incidenteve që ndodhën në stadiumin e Partizanit të Beogradit. Madje, gazeta madrilene shkon deri aty sa merr në konsideratë mundësinë e përjashtimit nga faza kualifikuese e të dyja kombëtareve."AS" nënvizon se për herë të parë në 6 muajt e fundit, Joseph Blatter (presidenti i FIFA-s) dhe Michel Platini (presidenti i UEFA-s) janë të të njëjtit mendim sa i përket një çështjeje. "Ajo që ndodhi është e papranueshme, nuk ka asnjë justifikim", tha Platini. "E dënoj me forcë atë që ndodhi", tha Blatter. Gazeta e mbyll shkrimin duke cituar një burim të sajin në UEFA: "Ndëshkimi do të jetë shembullor dhe do të vijë shumë shpejt".
