Trajneri italian i Kombëtares se futbollit tha pas ndeshjes me Danimarkën se ekipi luajti një ndeshje të mirë dhe kishte shanse të mëdha për ta fituar ndeshjen.
“Jam gjysmë i kënaqur, si gjithë ata që na kanë ndjekur këtu dhe në shtëpi. Mendova se po e fitonim ndeshjen dhe në fakt do të kishte qenë një fitore e merituar. Paraqitja e skuadrës sonë ishte e mirë. Luajtëm siç duhej, me zgjuarsi për të shprehur të gjitha aftësitë tona. Do të ishte padrejtësi nëse do të humbisnim. Besoj se taktikisht zhvilluam një ndeshje perfekte. Rezultati të lë disi të zhgënjyer. Sot kemi 4 pikë ndaj barazimi me një kundërshtar të fortë është i rëndësishëm. Të shohim çfarë do të arrijmë të bëjmë me Serbinë, që është skuadra më e mirë e grupit teknikisht” – u shpreh trajneri De Biasi.
