Federata Shqiptare e Futbollit i përjashtoi për të gjithë sezonin nga stadiumet, si pasojë e dhunës gjatë ndeshjes Vllaznia -Tirona. Por “Tirona Fanatics” dhe pjesa tjetër e tifozerisë së ekipit kryeqytetas nuk kanë ndër mend ta lënë skuadrën vetëm. Duke ironizuar me vendimin e FSHF, ata u nisën në Korçë me veshje zyrtare, këmishë e kravatë.
Disa nga organizatorët thanë për lapsi.al se kjo ishte një formë proteste për t’i treguar Federatës se zyrtarët e saj nuk e njohin aspak realitetin e shkallëve të stadiumit, por dinë se çfarë ndodh vetëm nëpër zyra dhe në dhomat e zhveshjes.
Gjithashtu, në këtë transfertë tifozët nuk pranuan që klubi t’u mundësojë transmortin, pasi ata janë irrituar me ndjesën që drejtuesit e klubit kërkuan në Shkodër. Tifozët që u dhunuan në Shkodër nga kundërshtarët dhe gjatë përplasjes me policinë e quajnë ndjesën si ofendim ndaj tyre. Rreth 200 tifoza janë organizuar me autobusë të prenotuar prej vetë atyre dhe mjaft të tjerë kanë mbërritur në Korçë me autoveturat private.
